Azərbaycan, Bakı, 13 oktyabr / Trend , müxbir H.Vəliyev/
EUROGIRO pul köçürmələri sisteminə qoşulma hazırda Azərbaycan üçün komersiya cəhətdən səmərəsizdir, bu barədə çərşənbə axşamı jurnalistlərlə söhbətində Rabitə və İnformasiya Texnologiyaları Nazirliyinin Poçt rabitəsi şöbəsinin müdiri Novruz Məmmədov bildirib.
Məmmədovun sözlərinə əsasən, EUROGIRO sisteminə qoşulmaq üçün bu təşkilatın üzvü olmaq və üzvlük haqqı ödəmək lazımdır. Hazırda Azərbaycanın trafik həcminin 80 faizi bilavasitə MDB ölkələri ilə həyata keçirilir. Pul köçürmələrinin böyük əksəriyyəti bilavasitə postsovet məkanı ölkələri ilə həyata keçirilir, Avropa ölkələri ilə pul köçürmələrinin həcmi cüzidir.
"Bununla əlaqədar olaraq üzvlük haqqı ödəmək indiki göstəricilərə əsasən Azərbaycan üçün kommersiya cəhətdən səmərəsizdir", - Məmmədov bildirib.
Hazırda Ümumdünya Poçt İttifaqı STEFI (Secured Transfer of Electronic Financial Information) beynəlxalq pul köçürmələri sistemini EUROGIRO sistemi ilə uzlaşdırmaq barədə danışıqlar aparır. Əgər bu məsələdə müəyyən razılıq əldə olunsa, Azərbaycan STEFI sisteminin tamhüquqlu üzvü kimi avtomatik olaraq EUROGIRO sisteminə çıxış əldə edəcək.
EUROGIRО sistemi özündə banklara, poçt banklarına və poçt administrasiyasına xidmət edən şəbəkəni əks etdirir. Hazırda 42 dövlət yüksək səviyyədə pul köçürmələri xidməti göstərərək bu sistemdə iştirak edir. EUROGIRО Ümumdünya Poçt İttifaqı, VISA Electron,Western Union, Cirrus, Pay Pal, Master Card ilə çalışan ABŞ banklarının daxil olduğu Federal Ehtiyat Sistemi ilə sıx əməkdaşlıq edir.
Məqalə müəllifi ilə əlaqə ünvanı: [email protected]
