Azərbaycan, Bakı, 19 yanvar / Trend /
Azərbaycanın Mərkəzi Bankı və Dünya Bankı ilə birgə həyata keçirilən "Maliyyə xidmətlərinin inkişafı" layihəsi çərçivəsində poçt rabitəsi sektorunun inkişafı üzrə tədbirlər nəticəsində "Azərpoçt" MMC-nin (Azərbaycanın poçt rabitəsi operatoru) fəaliyyəti 2012-ci ildən sonra gəlirli olacaq. Bu barədə Azərbaycanın rabitə və informasiya texnologiyaları naziri Əli Əhmədov bazar ertəsi Prezident İlham Əliyevin sədrliyi ilə keçirilən Nazirlər Kabinetinin 2009-cu ildə ölkənin sosial-iqtisadi inkişafının yekunlarına həsr olunmuş iclasında deyib.
Nazirin sözlərinə görə, 2009-cu ildə Azərbaycanın poçt rabitəsi sektorunun gəlirləri 2008-ci illə müqayisədə 13,6% artıb.
Poçt şöbələri tamdəyərli maliyyə xidmətlərinin göstərilməsinə 2010-cu ildən başlayacaqlar ki, bu da artıq 2012-ci ildə poçt operatorunun gəlirliyini təmin etmək üçün əsas yaradacaq.
Başlanğıc mərhələdə poçt şöbələri məhdud bank əməliyyatları həyata keçirəcək. Buraya kassa əməliyatlarının aparılması, pul köçürmələri və müştəri hesablarının açılması və s. aiddir. Uzunmüddətli perspektivdə əhaliyə kreditlərin verilməsi də nəzərdə tutulur.
"Azərpoçt" Azərbaycanın bank bazarına çıxmaqla, bank bazarının oyunçuları üçün ciddi rəqabət təşkil edir. Bu gün Azərbaycanın bank bazarında 46 bank fəaliyyət göstərir, onların filiallarının ümumi sayı 500-dən artıqdır. "Azərpoçt"un poçt şöbələrinin sayı isə 1600-dən artıqdır.
