Azərbaycan, Bakı, 11 sentyabr /Trend, müxbir H.Vəliyev/
Rusiyanın telekommunikasiya avadanlıqları hazırlayıcısı və istehsalçısı QTECH Azərbaycanda tərəfdaşlıq şəbəkəsini artırmaq niyyətindədir. Bu barədə şirkətin məlumatında deyilir.
Şirkət tərəfdaşlara marketinq dəstəyi verir, sistem inteqratorları və müştəri-şirkətlərin mütəxəssislərinin təlimini keçirir.
QTECH-in layihələrinin meneceri Pavel Kaluqinin sözlərinə görə, şirkətin strategiyası MDB bazarının planlaşdırılmış şəkildə mənimsənilməsidir və hazırda şirkətin planlarına tədricən Belarus, Qazaxıstan, Azərbaycan, Ukrayna və Birliyin digər ölkələrində tərəfdaşlıq şəbəkəsinin artırılması daxildir.
Bu yaxınlarda QTECH "I-tech solution" (Qazaxıstan) və "Peşəkar şəbəkə sistemləri" (Belarus) şirkətləri ilə əməkdaşlıq haqqında müqavilələr bağlayıb. Tərəfdaşlığın məqsədi QTECH avadanlıqlarının satış həcminin artırılması və şirkətin Qazaxıstan və Belarusun telekommunikasiya bazarlarında iştirakının genişləndirilməsidir.
QTECH Belarusda "Beltelekom", Qazaxıstanda "QazTransKom" və "Qazaxtelekom" telekommunikasiya şirkətləri üçün dörd yeni tərəfdaşlıq layihəsinin həyata keçiriləcəyinə ümid edir. Qazaxıstanda Rusiya istehsalçısının potensial sifarişçiləri simsiz rabitə operatorları "2Day Telecom" və "Kcell"dir.
Belarus və Qazaxıstanın sistem inteqratorları ilə razılıq QTECH-in MDB bazarında iştirakı üçün ilk addım deyil. Avqustda QTECH Azərbaycanın SiSTEMA şirkəti ilə əməkdaşlıq haqqında tərəfdaşlıq sazişi imzalayıb.
Hazırda SiSTEMA tərəfdən QTECH-in avadanlıqları əsasında genişzolaqlı çıxış xidmətinin təqdim edilməsi üçün optik-lif şəbəkəsinin quraşdırılması üzrə pilot layihənin həyata keçirilməsi ilə bağlı işlər aparılır.
Bundan əvvəl Trend-ə SiSTEMA şirkətinin baş direktoru Aden İlizarovun dediyinə görə, avadanlıq əhaliyə genişzolaqlı internetin xidmətinin təqdim edilməsi məqsədilə "Ethernet" şəbəkəsinin quraşdırılması üçün istifadə ediləcək. Hazırda SiSTEMA QTECH-in yaxın vaxtlarda internet-servis provayderlərinin əldə edə biləcəyi DSL modemlərinin sınağını da keçirir.
