Azərbaycan, Bakı, 27 dekabr /Trend, müxbir H.Vəliyev/
Azərbaycan Rabitə və İnformasiya Texnologiyaları Nazirliyi ölkənin mobil rabitə operatoru ilə nömrələrin köçürülməsi üzrə xidmətlərin tətbiqi qaydalarını (MNP - Mobile Number Portability) razılaşdırıb. Bu barədə Trend-ə bazar ertəsi nazirliyin Tənzimləmə şöbəsinin müdiri Əliyar Təmirov deyib.
Təmirovun sözlərinə görə, qaydaların razılaşdırılması baxılmaq üçün Azərbaycan Ədliyyə Nazirliyinə təqdim ediləcək. O bəyənildikdən sonra bu xidmətin tətbiqi üçün infrastrukturun yaradılması üzrə işlərə başlanacaq.
"Hazırlıq qaydalarında mobil rabitə operatorlarının fikir və təklifləri nəzərə alınıb. Xidmətin praktiki olaraq harada tətbiq ediləcəyi barədə danışmaq çətindir, lakin çox güman ki, bu, artıq gələn il baş tutacaq", - Təmirov bildirib.
Qaydalarda bu xidmətin artıq tətbiq edildiyi region ölkələrinin təcrübəsi də öz əksini tapıb. Nömrələrin köçürülməsi xidmətinin tətbiqi üçün bir sıra texniki və normativ-hüquqi məsələləri həll etmək lazımdır. İlkin mərhələ üzrə normativ bazanın yaranmasından sonra xidmət mobil rabitə operatorlarının şəbəkələrinə, gələcəkdə isə zərurət yaranacağı halda, stasionar rabitə operatorlarının şəbəkələrinə tətbiq olunacaq.
Azərbaycanda MNP xidmətinin tətbiqi abonentlərə operatoru dəyişəcəkləri halda öz nömrələrini saxlamağa imkan verəcək ki, bu da onları nömrələrini dəyişdikləri barədə yaxın adamlarını və iş tərəfdaşlarını xəbərdar etmək zərurətindən azad edir.
Azərbaycanda xidmətin tətbiqi üçün işçi qrupu yaradılıb ki, bura Azərbaycanın telekommunikasiya xidmətləri bazarında fəaliyyət göstərən mobil rabitə operatorları da daxildir.
Nömrələrin köçürülməsi xidmətinin tətbiqi rəqabətin inkişafını stimullaşdırır, çünki operatorlar öz əvvəlki abonentlərini saxlamaq üçün əlavə səylər və yenilərinin cəlb olunması üçün daha cəlbedici xidmətlər göstərməli olacaqlar.