Azərbaycan, Bakı, 28 dekabr /Trend, müxbir H.Vəliyev/
2011-ci ilin yanvarında dərman preparatlarının reyestri Azərbaycan Səhiyyə Nazirliyinin Dərman Vasitələrinin Analitik Ekspertiza Mərkəzinin rəsmi internet-resursuna birləşdiriləcək. Bu barədə Trend-ə mərkəzdən bildirilib.
Reyestrin mərkəzin internet-resursuna birləşdirilməsi istehlakçılara seriya nömrəsi ilə axtarış verməklə aldıqları dərman preparatlarının keyfiyyətə uyğunluğunu müəyyən etməyə imkan verəcək.
Bu gün Azərbaycana rəsmən idxal olunan hər bir dərman preparatı mərkəzin laboratoriyasında yoxlamadan keçirilir, bundan sonra onun müalicə üçün qəbulunun təhlükəsizliyinə zəmanət verən keyfiyyət sertifikatı verilir. Preparatın seriyası reyestrin məlumat bazasına daxil edilir.
Dərmanlar haqqında məlumatın verilməsindəki yeni qaydalar əczaçılıq bazarının bütün iştirakçıları üçün prosedurların şəffaflığını təmin edir.