Azərbaycan, Bakı, 15 yanvar /Trend, müxbir H.Vəliyev/
2010-cu il ərzində Naxçıvan Muxtar Respubliksının rabitə müəssisələri tərəfindən 2,88 milyon manatdan artıq məbləğdə xidmətlər göstərilib. Bu barədə NMR Rabitə və İnformasiya Texnologiyaları Nazirliyinin şənbə günü yaydığı məlumatda deyilir.
Nazirliyin məlumatına görə, 2010-cu ildətelekommunikasiya xidmətlərindən əldə olunan gəlirin həcmi 221 min manata yaxın təşkil edib.
2010-cu ilin yekunları üzrə ümumi telefon şəbəkəsinin nömrə tutumu 2812 ədəd artırılıb. NMR-in telekommunikasiya səbəkəsi üzrə nömrələrin ümumi sayı 60 min ədədə çatır. Son 9 il ərzində şəbəkənin nömrə tutumu 25,3 min ədədədək artırılıb.
2011-ci il yanvarın 1-nə olan vəziyyətə görə, Muxtar Respublikada hər yüz nəfərə 66,4 telefon aparatı düşür.
2010-cu ildə Naxçıvan şəhərinin Babək qəsəbəsinin və Nehrəm kəndinin telekommunikasiya səbəkəsi yeni nəsil şəbəkəsinə (NGN-Next Generation Network) keçirilib. Şəbəkə Naxçıvan şəhərinin Rabitə İdarəsində yerləşən mərkəzi idarəetmə və nəzarət sistemindən və 20256 ədəd abunə nömrə tutumundan ibarət telekommunikasiya infrastrukturundan ibarətdir. Yeni nəsil şəbəkəsinin tətbiqi ənənəvi rabitə xidmətləri ilə yanaşı IP-TV, videotelefoniya, genişzolaqlı İnternet xidmətləri göstərməyə də imkan verir. Stasionar telefon şəbəkəsində təqdim olunan servislərin sayı 24 ədəd təşkil edir.
Nazirliyin statistikasına görə, NMR-də mobil rabitənin yayılma səviyyəsi 88 faizə çatıb. NMR üzrə mobil rabitə istifadəçilərini ümumi sayı 358 min abunəçi təşkil edir.
