Azərbaycan, Bakı, 24 yanvar /Trend, müxbir H.Vəliyev/
Azərbaycan Rabitə və İnformasiya Texnologiyaları Nazirliyinin "Aztelekom" İstehsalat Birliyi respublikanın bütün ərazisi üzrə əhalinin telefonlaşdırılması prosesini sürətləndirməyi planlaşdırır. Bu barədə İB-nin baş direktoru Məhəmməd Məmmədov deyib.
Məmmədovun sözlərinə görə, paytaxtla müqayisədə regional səviyyədə telefonlaşdırma prosesi bir qədər ləng gedir, bu isə bir sıra səbəblərlə əlaqədardır. Onlardan biri kabel xəttlərinin, telefon rabitəsi xəttlərinin çəkilməsi prosesidir, buna müvafiq olaraq telefon rabitəsi siqnalının son istifadəçiyə çatdırılması, bundan başqa, genişzolaqlı İnternet xidmətinin göstərilməsidir.
Nazirliyin yanvarın 1-nə olan statistikasına əsasən, respublika üzrə hər 100 nəfərə 16,24 telefon düşür. Bu göstərici paytaxt üzrə 34,9 ədəd, regionlar üzrə 10,7 ədəd, kənd yerlərində isə 7 ədəd təşkil edir.
2010-cu ilin yekunları üzrə regional telekommunikasiya qovşaqlarının yenidən qurulmasına 21,3 milyon manatdan çox yönəldilib ki, bu da operatorun nömrə tutumu şəbəkəsini 182 384 nömrə artırmağa imkan verib.
"Bu il əsas vəzifəmiz əhalinin telefonlaşdırılması prosesinin sürələndirilməsi və genişzolaqlı qoşulmaların sayının artırılması olacaq", - Məmmədov bildirib.
"Aztelekom"un baş direktorunun sözlərinə görə, bu gün özəl İnternet servis provayderlərinin şəbəkəsi vasitəsilə qoşulmaların sayı dövlət operatorlarının genişzolaqlı portalları üzrə qoşulmaların sayını üstələyir. AztelekomNet dövlət provayderinin şəbəkəsində genişzolaqlı İnternet istifadəçilərinin sayı 20 min təşkil etdiyi halda, özəl provayderlərin portalları vasitəsilə qoşulmaların sayı 27 minə çatır.