...

Azərbaycanda regionlar üçün məsafədən təhsilin yeni platforması yaradılıb

Telekommunikasiya Materials 10 Mart 2011 13:47 (UTC +04:00)

Azərbaycan, Bakı, 10 mart /Trend, müxbir H.Vəliyev/

"AzScienceNet" akademik şəbəkəsi azərbaycanlı alimlərin ölkənin regionlarındakı ali məktəblərin tələbələri ilə qarşılıqlı fəaliyyətini təmin edəcək. Bu barədə Trend-ə Azərbaycan Milli Elmlər Akademiyasından (AMEA) məlumat verilib.

Qarşılıqlı fəaliyyətin təmin edilməsi üçün məsafədən təhsilin yeni platforması fəaliyyət göstərəcək. "AzScienceNet" akademik şəbəkəsində yerləşdiriləcək platforma ilk növbədə yaxın vaxtlarda Naxçıvan Muxtar Respublikasında işə salınacaq. Bu, Naxçıvan Dövlət Universitetinin tələbələri üçün məsafədən təhsil kursları, mühazirələr də təşkil etməyə imkan verəcək.

Alimlər mühazirələri Bakıda yerləşəcək baş mərkəzdə oxuyacaqlar. Ali məktəbin tələbələri interaktiv rejimdə onlarla ünsiyyət qura və suallar verə biləcəklər.

Akademik şəbəkənin baş mərkəzinin muxtar respublika ilə qarşılıqlı fəaliyyəti üçün optik-lif rabitə xəttindən və peyk texnologiyalarından istifadə olunacaq. İnternet xidmətlərinin tədarükçüsü kimi "Delta Telecom" ilkin provayderi çıxış edir.

Xəbər lenti

Xəbər lenti