Azərbaycan, Bakı, 10 mart /Trend, müxbir H.Vəliyev/
"Mobisky" şirkəti bir sıra satış və xidmət obyektlərində mobil telefonlardan əlaqəsiz ödənişlər sisteminin sınağını başa çatdırır. Bu barədə Trend-ə cümə axşamı şirkətdən deyiblər.
Simsiz rabitə operatoru "Azercell" abonentlərinin istifadə edə biləcəyi xidmət yaxın aylarda sınaq istismarına veriləcək.
Bakının ticarət obyektlərində (onların adı hələ ki açıqlanmır) hesablayıcı qurğular quraşdırılacaq. Onlara telefonu yaxınlaşdırmaqla alış və ya xidməti ödəmək mümkün olacaq. Bu günə sistem ödəniş üçün Bakı Metropoliteninin bütün stansiyalarında tətbiq edilir.
"Mobisky" şirkətindən dediklərinə görə, yaxın aylarda yeraltı nəqliyyatda gediş üçün ödəniş üzrə bir sıra yeniliklərin tətbiqi gözlənilir.
Yeraltı nəqliyyatda gediş üçün yeni ödəniş vasitəsi vəsaitlərin abonentin mobil hesabından köçürülməsi vasitəsilə elektron balansın alışını nəzərdə tutur.
SMS göndərildikdən sonra ştrix-kodların yüklənməsi üçün abonentin qurğusuna dərhal yüklənən link daxil olur. Bundan sonra ştrix-kod istifadə üçün aktiv olur. Sərnişin turniketə yaxınlaşarkən telefonun ekranında aldığı ştrix-kodu açır və telefonu hesablayıcı qurğuya yaxınlaşdıraraq metropolitendə gediş haqqını ödəmiş olur.
