Azərbaycan, Bakı, 24 iyun /Trend, müxbir H.Vəliyev/
İyulda ABŞ-ın "Orbital Science Corporation" şirkəti ilk milli telekommunikasiya peyki "Azerspace"in buraxılması proqramı üzrə son konstruksiyanı (CDR - Critical Design Review) qiymətləndirəcək. Bu barədə cümə günü Trend-ə layihəyə yaxın mənbə deyib.
CDR-in başa çatması peykin tikintisinin gələcək gedişinin yollarını müəyyənləşdirəcək.
İyulun ortalarında Azərbaycan nümayəndə heyətinin ABŞ-a səfəri gözlənilir. Nümayəndə heyəti orada bununla bağlı planlaşdırılan təqdimatda iştirak edəcək.
Tərəflər "Azerspace" peykinin dizaynı, onun texniki xüsusiyyətlərini və bu layihə çərçivəsində həyata keçirilən işləri müzakirə edəcəklər.
Buna kimi peyk istehsalçısı "Orbital Science Corporation" tikintiyə peykin ayrı-ayrı hissələrinin hazırlanması üzrə işlər aparan podratçıları cəlb edib. "Azerspace" peykinin tikintisi üzrə işlər tam olaraq 2012-ci ilin sentyabrında başa çatmalıdır. Peykin orbitə çıxarılması isə 2012-ci ilin sonunda həyata keçiriləcək.
Çəkisi 3 tondan çox olacaq "Azerspace" peyki Fransanın "Arianspace" şirkətinin "Ariane 5 ECA" raketdaşıyıcısında Cənubi Amerikanın şimal-şərqində, Fransa Qvianasında yerləşən Kuru kosmodromundan (Qviana kosmik mərkəzi) buraxılacaq.
Peykin yerləşdiriləcəyi orbital mövqe isə Malayziyanın MEASAT peyk operatorundan icarəyə götürülüb.
Azərbaycanın telekommunikasiya peyki "Azerspace" rəqəmsal teleradio yayım, internet şəbəkəsinə çıxış, məlumat ötürülməsi, VSAT multiservis şəbəkəsinin yaradılması kimi xidmətlərin göstərilməsi üçün nəzərdə tutulub.
"Azerspace" telekommunilkasiya peyki rəqəmli teleradio yayımı xidmətlərinin göstərilməsi, internet şəbəkəsinə çıxış, məlumatların ötürülməsi, VSAT multiservis şəbəkəsinin, eləcə də hökumət əlaqələrinin yaradılması üçün nəzərdə tutulub. "Azerspace" peyki C diapazonlu 24 transponderlə (tezlik zolağı 4-6 GHz) və Ku diapazonlu 12 transponderlə (tezlik zolağı 11-13 GHz) təchiz olunacaq.
"Azerspace"in xidmət zonasına Avropa, Mərkəzi Asiya və Afrika ölkələri daxil olacaq. Peykin orbitdə istismar müddəti 20 ilə qədər təşkil edəcək.
