Azərbaycan, Bakı, 30 iyun /Trend, müxbir H.Vəliyev/
AzScienceNet elmi kompüter şəbəkəsi çərçivəsində istifadəçi eyniləşdirmə bazası ilin sonunadək işə salınacaq. Bu barədə cümə axşamı Trend-ə Azərbaycan Milli Elmlər Akademiyasının (AMEA) İnformasiya Texnologiyaları İnstitutunun (İTİ) baş mühəndisi Rəşid Ələkbərov məlumat verib.
Ələkbərovun sözlərinə görə, bu istiqamətdə işlər gələn həftədən başlayacaq, xidmətin özündən isə DATA-mərkəz fəaliyətə başladıqdan sonra istifadə etmək mümkün olacaq. O, artıq bu il istismara veriləcək.
Eyniləşdirmə bazasının tətbiqi vahid sistemin avtorizasiyası vasitəsilə həyata keçiriləcək elmi kompüter şəbəkəsinin xidmət siyahısını təsnifləşdirməyə imkan verəcək.
"İstifadəçilərdən giriş zamanı hər dəfə parol və loqini daxil etmək tələb olunmayacaq. Məsələn, elektron kitabxanaların məlumat bazasına, poçt serverindən, GRID xidmətlərindən, "bulud hesablamaları"ndan, Eduroam xidmətindən və s. istifadə zamanı. Bütün bu xidmətlərə veb-interfeys vasitəsilə çıxış mümkün olacaq, bu zaman yalnız fərdi tanınma məlumatlarından istifadə olunacaq. Lakin bu xidmətlər istifadəçi kateqoriyasından asılı olaraq məhdudlaşdırılacaq, daha doğrusu, istifadəçilərin müəyyən kateqoriyası, məsələn, iki-üç xidmətdən istifadə edə biləcək, digərlərinə isə xidmətlərin daha böyük siyahısından istifadə etməyə imkan veriləcək", - Ələkbərov bildirib.
