Azərbaycan, Bakı, 9 yanvar /Trend, müxbir H.Vəliyev/
Azərbaycandakı bütün iri yanacaqdoldurma stansiyalarında (YDM) artıq yeni kassa aparatları quraşdırılıb. Bu barədə bazar ertəsi Trend-ə "Caspel" şirkətindən məlumat verilib.
"Caspel" şirkəti IBM SurePOS 100 kassa aparatlarının tədarükçüsüdür. Qurğuların proqram tərtibatının ("SayberNet YDM POS v2.0") istehsalçısı qismində "SayberNet" şirkəti, onun YDM-də instalyasiyası ilə "Pos-service" şirkəti məşğul olur.
"Bu gün yanacaqdoldurma stansiyaları üçün zəruri avadanlıqlar respublikanın bütün iri YDM-lərinə çatdırılıb və quraşdırılıb. Ölkəyə gətirilən yeni nəzarət-kassa aparatları 2,5 min ədəd təşkil edir", - "Caspel" şirkətindən bildiriblər.
Şirkətdən deyildiyi kimi, respublikanın yanacaqdoldurma stansiyalarının yeni nəzarət-kassa aparatlarına tam keçidi ayın sonlarında gözlənilir. Bu gün respublikadakı YDM-lərin ümumi sayı təxminən 850 ədəd təşkil edir.
Yeni nəzarət-kassa aparatlarının tətbiqi Azərbaycan Nazirlər Kabinetinin "Azərbaycanın yanacaqdoldurma stansiyalarında nəzarət-kassa aparatlarının tətbiqi haqqında" qərarına uyğun olaraq başlanılıb.
Sənədə əsasən, qeydiyyat və qəbzin verilməsi olmadan neft məhsullarının və qazın satışını bloklayan köhnə aparatların xüsusi konstruksiyaya və texniki göstəricilərə malik, dövlət reyestrində qeyd edilmiş yeni nəzarət-kassa aparatları ilə əvəz edilməsi nəzərdə tutulur.
