İcazələrin elektron informasiya portalının xidmətlərindən 202 minə yaxın istifadəçi yararlanıb

Azərbaycan, Bakı, 12 noyabr /Trend/

İcazəverici sənədlər və onların alınması prosedurları barədə ölkə vətəndaşlarının, eləcə də sahibkarların məlumatlılıq səviyyəsinin yüksəldilməsi məqsədilə İqtisadiyyat və Sənaye Nazirliyi tərəfindən yaradılmış www.icazeler.gov.az portalının xidmətlərindən indiyədək 202 minə yaxın internet istifadəçisi yararlanıb.

Nazirliyin mətbuat xidmətindən Trend-ə verilən məlumata görə, təkcə oktyabr ayında 12 500-dən çox internet istifadəçisi portalı ziyarət edib. Oktyabr ayında portalın istifadəçiləri arasında 37 ölkədən - Böyük Britaniya, Rusiya, ABŞ, Türkiyə, Almaniya, Ukrayna, Latviya, Cənubi Koreya, Qazaxıstan, Gürcüstan, İtaliya, Norveç, BƏƏ, Avstraliya, Fransa, Malayziya, Macarıstan, Hindistan, Polşa, İsveç, Avstriya, Niderland, Yaponiyadan və s. olan istifadəçilər üstünlük təşkil edib.

Sahibkarların məlumatlılıq səviyyəsini artırmaq, qanunvericilik aktlarının hazırlanması prosesində onların yaxından iştirakını təmin etmək məqsədilə mərkəzi icra hakimiyyəti orqanlarının qanunvericilik aktlarının layihələri də icazələrin elektron informasiya portalında yerləşdirilir. İndiyədək 17 dövlət qurumunun 129 qanunvericilik aktlarının layihəsi ictimai müzakirəyə təqdim olunmaq üçün icazələrin elektron informasiya portalında yerləşdirilib.