3COM şirkətinin Azərbaycandakı rəsmi tərəf-müqabili - Caspel şirkəti Wi-Max və Wi-Fi İnternet xidmətlərini göstərməyi planlaşdırır. Trend in verdiyi xəbərə görə, bu barədə şirkətin baş meneceri Mübariz Piriyev bildirib.
Onun sözlərinə görə, hazırda yeni texnologiyaların tətbiqinin, layihə üzrə planlaşdırılmış vəsaitlərin həcminin və texniki imkanların məqsədəuyğunluğunun təhlili üzrə işlər görülür. "Əgər araşdırmalar texnologiyanın tətbiqinin effektivliyini və ona tələbatın olduğunu göstərsə, o zamn biz işlərə başlayacağıq", - deyə şirkət başçısı qeyd edib.
Wi-Fi - (Wireless Fidelity) - IEEE 802.11b standartlı radiokanallar üzrə rəqəmli məlumatların ötürülmə formatlarından biridir. Bu, istifadəçilərin İnternet şəbəkəsinə kollektiv qoşulmasına imkan yaradan dünyada ən məşhur texnologiyadır. Bu texnologiya əsasında mehmanxana, kafe, restoran və ya biznes-mərkəzə gələn istənilən şəxs İnternet şəbəkəsinə mobil qoşulma imkanını, müvafiq olaraq da, yerdəyişmə sərbəstliyini (hot-spot həddində) əldə edir. Wi-Fi modulu ilə təchiz olunmuş portativ kompüterin (noutbuk) sahibi güclü ayrılmış xəttin (11 Mbit/san qədər) keçirmə qabiliyyəti ilə müqayisə edilən sürətlə İnternetə qoşula bilər. Bu zaman İnternet şəbəkəsinə qoşulma naqil və modemlərsiz həyata keçirilir və bu da istifadəçinin şəbəkəyə qoşulmasını xeyli asanlaşdırır.
Wi-Max (Worldwide Interoperability for Microwave Access) - 2003-cü ilin yanvar ayında qəbul olunmuş və bir sıra tanınmış şirkətlərin daxil olduğu sənaye qrupu tərəfindən dəstəklənmiş simsiz rabitə standartının kommersiya "adı"dır.
Caspel şirkəti məlumatın ötürülməsi və İnternet xidmətlərin göstərilməsi üzrə Azərbaycanda ən böyük operatorlardan biridir. Caspel şirkəti informasiya texnologiyları və telekommunikasiya sahəsində sistem inteqratoru qismində mövqe tutur. Özəl və dövlət şirkətləri, fəaliyyətin müxtəlif sahələri ilə məşğul olan təşkilatlar: banklar, dövlət və hökümət müəssisələri, istehsal müəssisələri, birgə müəssisələr, nəqliyyat firmaları, təhsil müəssisələri, özəl firmalar və s. onun müştəriləridir.
