Cisco Systems şirkətinin prezidenti və icraçı direktoru Con Çembers (John T.Chambers) qısa müddətli işgüzar səfərlə Bakıdadır. Rabitə və İnformasiya Texnologiyaları Nazirliyindən Trend ə verilən məlumata görə, bu gün səhər o, rabitə naziri Əli Abbasovla görüşüb.
Görüşdə nazir informasiya texnologiyaları sahəsində aparılan islahatlar və gerçəkləşdirilən layihələr, o cümlədən "Elektron Azərbaycan" dövlət proqramı haqqında C.Çembersə məlumat verib. O, yüksək texnologiyalar üzrə xüsusi iqtisadi zona çərçivəsində əməkdaşlıq üçün əlverişli şəraitin olduğunu vurğulayıb, bu sahəyə sərmayə qoyuluşu imkanlarından bəhs edib.
Cisco Systems şirkətinin başçısı qeyd edib ki, Azərbaycanın İT sahəsinin perspektivli olması qənaətindədir.
O, ölkəmizə səfərini əməkdaşlığın genişləndirilməsində maraqlı olması ilə izah edib. C.Çembersin fikrincə, Azərbaycanda iqtisadi vəziyyət kifayət qədər sabitdir. C.Çembers hesab edir ki, Azərbaycan sərmayə qoyuluşu və hər hansı innovasiya qəbuluna hazır olma nöqteyi-nəzərindən regionda cəlbedici ölkələrdən biridir.
C.Çembers iqtisadi inkişaf naziri Heydər Babayevlə də görüşəcək.