Azərbaycanın Rabitə və İnformasiya Texnologiyaları Nazirliyi ölkədə universal telekommunikasiya xidmətlərinin (UTX) təşkili üzrə işlər görür. Bu barədə Trend ə nazirlikdən xəbər veriblər.
Hazırda bu işlər üçün tələb olunan ilkin xərclər müəyyənləşdirilib, UTX-nin təşkil ediləcəyi yaşayış obyektlərinin siyahısı hazırlanıb.
Rabitə Nazirliyində həmçinin qeyd ediblər ki, layihənin həyata keçirilməsində maliyyə yardımının göstərilməsi üçün ölkənin Nazirlər Kabinetinə müraciət təqdim olunub.
Azərbaycan Respublikasının "Telekommunisiyalar haqqında" Qanunun 31-ci maddəsinə əsasən, UTX ölkənin bütün ərazilərində müəyyən müddətdə və münasib qiymətə keyfiyyətli telekommunikasiya xidmətlərinin göstərilməsində operator və provayderlər üçün məcburidir.
Təsnifat, təşkil, keyfiyyət, müddət və UTX-nin digər tələbləri aşağıdakı prinsipləri nəzərə almaqla, İcra Hakimiyyətinin (İH) müvafiq orqanları tərəfindən müəyyən olunur: hər bir yaşayış məntəqəsində yanğınnsöndürmə, polis, təcili tibbi yardım, qaz, elektrik, qəza və qanunvericilikdə nəzərdə tutulan digər ixtisaslaşdırılmış təcili yardım xidmətləri ilə ödənişsiz əlaqə yaratmaq məqsədilə, ən azı bir taksofon (və ya kollektiv istifadəli telefon) quraşdırılmalıdır. Bütün hallarda nəqliyyat vasitəsindən istifadə etmədən universal telekommunikasiya xidməti vasitəsinə çatmaq üçün sərf edilən vaxt müvafiq icra hakimiyyəti orqanı tərəfindən müəyyən olunan müddətdən artıq olmamalıdır.
Universal telekommunikasiya xidmətinin göstərilməsi qanunvericiliklə müəyyən edilmiş qaydada keçirilən müsabiqə nəticəsində seçilmiş operator, provayder tərəfindən, müsabiqə baş tutmadığı halda isə üzərinə universal xidmətlərin göstərilməsi vəzifəsi qoyulmuş telekommunikasiya operatoru tərəfindən müqavilə əsasında həyata keçirilir. Universal telekommunikasiya xidmətlərinin göstərilməsi üçün operatora, provayderə lazım olan vəsaitin ayrılması və ya bu məqsədlə sərf olunan vəsaitin geri qaytarılması (kompensasiya) qaydası müvafiq icra hakimiyyəti orqanı tərəfindən müəyyən edilir. UTX üzrə tarif və hesablaşma qaydası müvafiq İH və operator arasında bağlanmış müqavilə əsasında tənzimlənir.
Nazirlikdə bildiriblər ki, UTX-nin təşkili səbəbindən provayder və operatorlara ziyanın ödənilməsi üçün dövlət xəzinəsində artıq müvafiq hesab açılıb.