İqtisadi İnkişaf Nazirliyi nəzdində yaradılmış Təhvil-Təslim üzrə Dövlət Komissiyası "Bakı elektrik şəbəkəsi" və "Sumqayıt elektrik şəbəkəsi" səhmdar cəmiyyətlərində inventarizasiya işlərini başa çatdırıb. Bu barədə Trend ə Azərbaycanın iqtisadi inkişaf nazirinin müavini Mikayıl Cabbarov məlumat verib.
"İnventarizasiya zamanı avadanlıqların nasazlığı aşkarlanıb. Lakin hazırda təhvil-təslim əməliyyatlatları başa çatmayıb və şəbəkələr Barmek tərəfindən idarə olunur", - deyə o bildirib.
Onun sözlərinə görə, komissiyanın inventarizasiya üzrə yekun rəyi bu həftə hökumətə təqdim olunacaq. "Araşdırmalar, əsasən, kapital yatırımı, mühasibat uçotu məsələləri, ekologiya sahəsində tələblərin yerinə yetirilməsi ilə bağlı vəziyyət, şirkətin maliyyə dayanıqlığı, yığımların təşkili və s. istiqamətdə aparılıb", - deyə M. Cabbarov qeyd edib.
2001-02-ci illərdə bu şəbəkələr "Barmek Holding"in idarəçiliyinə verildikdən sonra, "Bakı elektrik şəbəkəsi"nin bazasında "Barmek Azerbaijan" yaradılıb. Hər iki şəbəkənin aktivləri şirkətin balansına keçirilib.
