Yaxın günlərdə Azərbaycanın Rabitə və İnformasiya Texnologiyaları Nazirliyi Bakıda AzDATACOM şəbəkəsinin mərkəzi qovşağının tikintisini başa çatdıracaq. Bundan sonra AzDATACOM şəbəkəsi paytaxtda öz işinə başlayacaq. Bu barədə Trend ə rabitə və informasiya texnologiyaları nazirinin müavini İltimas Məmmədov məlumat verib.
Onun sözlərinə görə, Azərbaycanın digər bölgə və şəhərlərinin də daxil olduğu layihə üzrə işlərin ikinci mərhələsi Bakıda müvafiq işlərin tamamlanmasından dərhal sonra başlanacaq. İlk növbədə şəbəkə bölgələrdə optik-lif rabitə xəttlərinin olduğu yerlərdə çəkiləcək.
AzDatacom -un Bakı halqası 10 Gb/s-ə qədər keçirtmə qabiliyyətinə malik olacaq, rayonlarda bu göstərici 1 Gb/s-ə çatacaq. Gələcəkdə bu rəqəm 10 Gb/s-ə qədər artacaq.
Şəbəkəyə təhsil müəssisələri, dövlət təşkilatları qoşulacaq. Bu şəbəkədən istifadənin dəyəri indi olduğu kimi məsafədən asılı olmayacaq. Dəyişdirilmiş tarif siyasəti həmin şəbəkənin bazasında servislərin sayını xeyli artırmağa imkan verəcək. İnternet- provayderlər digər xidmət növləri üzrə də bölgələrdə bizneslərini inkişaf etdirə bilərlər.
Layihə Rabitə Nazirliyi və BMT-nin İnkişaf proqramının (UN DP) birgə həyata keçirdiyi "Milli elektron idarəetmə təşəbbüsü" (National E-Governance Network Initiative) texniki yardım proqramı tərəfindən həyata keçirilir və Azərbaycanda informasiya-kommunikasiya texnologiyalarının inkişafı üzrə dövlət proqramındakı (Elektron Azərbaycan) tədbirlərdən biridir.