Paris məhkəməsində Maltanın "First International Merchant Bank"ı ilə (FİMbank) bağlı iş üzrə Azərbaycan tərəfinin müraciətinə baxılacağı tarix müəyyən olunub. Azərbaycan Rabitə və İnformasiya Texnologiyaları Nazirliyindən Trend ə verilən məlumata görə, müraciətə oktyabrın 13-də Parisdə baxılacaq.
Bir qədər əvvəl Paris məhkəməsi "FİMbank"ın iddiası əsasında Azərbaycanın Fransanın "Eutelsat S.A" şirkətinə yatırdığı 500 min səhminə və onun məbləği $1 mln-dan çox olan dividendlərinə qadağa qoyub.
Bu yaxınlarda isə bankın digər bir vəsadəti əsasında məhkəmə həmin vəsaitlərin xüsusi hesabda girov saxlanılması ilə bağlı qərar qəbul edib. Məhkəmənin son qərarından sonra Paris məhkəməsi tərəfindən 6,5 mln. avro dəyərində qiymətləndirilən bu vəsaitlər avtomatik olaraq xeyrinə hökm çıxarılmış tərəfin balansına keçəcək.
2004-cü ildə Maltanın "FİMbank"ı Azərbaycan hökumətinə qarşı iddia ilə çıxış edib. İddia guya Rabitə Nazirliyi və "Pochtbank" SKB-nın zəmanəti ilə nazirliyin mövcud olmayan "Aztell" və "Baktell" şirkətlərinə müvafiq olaraq $3035000, $1560000 məbləğində ayrılan kreditin ödənilməməsi faktı üzrə irəli sürülüb.
