Azərbaycanın Rabitə və İnformasiya Texnologiyaları Nazirliyi Dünya Bankı ilə birgə həyata keçirilən "Maliyyə xidmətlərinni inkişafı" layihəsi çərçivəsində Azərpoçt dövlət müəssisəsinin baş ofisinin avtomatlaşdırılması üzrə işləri başa çatdırır. Bu barədə Trend ə müəssisədən məlumat verilib.
Tam avtomatlaşdırma 10 gün ərzində başa çatacaq.
Bundan başqa, müəssisə əməkdaşlarının ixtisaslarının yeni sistem üzrə iş üçün artırılması məqsədilə treninqlərin keçirilməsi planlaşdırılır.
"Bu tədbirin bir qədər gec, Hollandiyanın ING Group şirkəti mütəxəssislərinin ilin sonunadək səfərindən sonra həyata keçirilməsi planlaşdırılır", - deyə dövlət müəssisəsindən vurğulayıblar.
Layihə gerçəkləşdirildikdən sonra Azərpoçt müvafiq status alacaq və maliyyə, bank xidmətləri göstərmək üçün milli ödəmə sisteminə qoşulacaq.
Müəssisədə hesab olunur ki, paytaxtda bu xidmətləri artıq 2007-ci ildə göstərmək mümkün olacaq.
Layihə 2005-2008-ci illərdə Azərbaycanda rabitə və telekommunikasiya sahəsinin inkişafı üzrə dövlət proqramı çərçivəsində həyata keçirilir. 3 illik layihənin ümumi dəyəri $17,5 mln. təşkil edir. Bunun $12,25 mln-u DB-nin, yerdə qalan hissə isə Azərbaycan hökumətinin payına düşür.
