Azərbaycan,Bakı/müxbir Trend S.Babayeva/Bakıda ilk dəfə olaraq informasiya texnologiyaları üzrə Azərbaycan-İsrail biznes forumunun keçirilməsi nəzərdə tutulur. Bu barədə bazar ertəsi İsrailin Azərbaycandakı səfirliyindən məlumat verilib.
Bakıya İsrailin İxrac və Beynəlxalq Əməkdaşlıq İnstitutunun (The Israel Export and International Cooperation Institute) nümayəndə heyəti, İsrailin 10-dan çox şirkət nümayəndələrinin səfəri gözlənilir. Nümayəndə heyətinin səfəri 7-8 may tarixlərində baş tutacaq.
Səfirliyin məlumatına əsasən, səfər zamanı "Azercell Telecom" BM və "Aztelekom" BM-lə görüş planlaşdırılıb. Mayın 8-də IT sahəsinin orta və kiçik müəssisələrinin dəvət olunduğu geniş IT forumu keçiriləcək. Foruma dəvət olunmuş Azərbaycan şirkətlərinin sayı təxminən 30 şirkət təşkil edir.
Tədbirlərdə Azərbaycanın Rabitə və İnformasiya Texnologiyaları Nazirliyinin nümayəndələri iştirak edəcək.