Azərbaycan, Bakı /müx. Trend S.Babayeva/ Azərbaycanın Rabitə və İnformasiya Texnologiyaları Nazirliyi Sumqayıt şəhərində TAC KART kredit sistemini tətbiq edib. Nazirlikdən verilən məlumata görə, hazırda müvafiq sistem Quba, Gəncə, Naxçıvan Muxtar Respublikası Rabitə Nazirliyinin şəbəkəsində, habelə Dəvəçi, Qusar və Xaçmaz rayonlarında fəaliyyət göstərir.
TAC KART rabitə şəbəkəsində debitor sisteminin alternativi kimi yaradılan sistemdir. Sistemə qoşulmaq üçün abonentlər 2,4 və 10 manatlıq TAC KART kartlarını almalıdır. Fərdi ev nömrələrindən balansın müəyyənləşdirilməsi üçün "124" kodunu yığmaq və PİN kodu daxil etdikdən sonra balansa pul (kontur) yükləmək lazımdır. Beynəlxalq danışıqlar üçün "123" kodunu yığmaq və stansiyanın siqnalını gözləmək lazımdır, sonra isə nömrə yığmaq gərəkdir.
TAC KART sistemi "Aztelekom" İstehsalat Birliyinin baş direktoru Məhəmməd Məmmədov və müəssisənin informasiya texnologiyaları şöbəsinin müdiri Rasim Əliyev tərəfindən yaradılıb.
