Azərbaycan, Bakı/ Trend müxbir S.Babayeva/ Xəzər seqmenti Trans-Asiya-Avropa (TAA) fibrooptik kabel magistralınının Siyəzən (Azərbaycan) - Aktau (Qazaxıstan) marşrutu üzrə tikintisinin iyun ayında Bakıda müzakirə olunması planlaşdırılır. Bu barədə Azərbaycan rabitə və informasiya texnologiyaları naziri Əli Abbasov cümə günü mətbuat konfransında bildirib.
Onun sözlərinə görə, Bakıya Türkiyə, Qazaxıstan və Gürcüstanın rabitə idarələrinin rəhbərləri dəvət olunub. Onlarla layihənin həyata keçirilməsi üçün konsorsiumun yaradılması planlaşdırılır.
Dənizin dibi ilə kabelin çəkilməsi ilə əlqədar olaraq layihənin qiyməti 7-10 mln. dollar olacaq. Qazaxıstan və Azərbaycan arasında məsafənin uzunluğu təqribən 380 km.-dir. İndi mövcud olan xətt isə Azərbaycandan yan keçməklə Türkmənistan və İran ərazisindəndir.
Nazir hesab edir ki: "TAA kabelinin Azərbaycan ərazisindən çəkilişi əsl sensasiya olacaq. Belə ki, məsafə 2000 metr qısalacaq və bu da informasiyanın daha sürətli ötürürlməsini təmin edəcək".
Layihə Mərkəzi Asiya ölkələrinə Azərbaycandan keçməklə Türkiyə ilə telekommunikasiya əlaqəsi saxlamağa imkan verəcək. Eyni zamanda Azərbaycan, Türkiyə, Gürcüstan və digər ölkələr Qazaxıstan ərazisindən keçməklə Çinlə birbaşa əlaqə saxlamaq imkanı qazanacaq.
