Azərbaycan, Bakı/ Trend müxbir S.Babayeva/ Hazırda rabitə və informasiya texnologiyaları sahəsində Azərbaycan və İsrail əməkdaşlığının gündəliyinə bir sıra məsələlər daxildir və bir yerdə işləməyin vaxtı çatıb. Bu barədə İsrailin Azərbaycandakı səfiri Artur Lenk "Rabitə dünyası" qəzetinə müsahibəsində bildirib.
Onun sözlərinə görə, Azərbaycan və İsrail arasında rabitə və informasiya texnologiyaları sahəsində əməkdaşlıq sazişi layhəsi artıq hazırdır və Azərbaycanın rabitə və informasiya texnologiyaları naziri Əli Abbasova təqdim olunub.
Səfir bildirib ki, 2008-ci ildə danışıqlar aparılacaq və sazişin imzalanacağı güman olunur.
Lenk bildirib ki, İsrail şirkətləri 21-24 noyabrda Bakıda keçiriləcək 13-cü beynəlxalq "Telekommunikasiya və İnformasiya Texnologiyaları" BakuTel-2007 sərgisində fəal iştirak etməyi planlaşdırır.
