Əfqanıstan, Kabil, 08 sentyabr / Trend , A.Həkimi / Əfqanıstan ekspertlərinin fikrincə, Pakistanın Silahlı Qüvvələri ilə təhlükəsizlik strukturu (ISI) bu ölkənin siyasətini müəyyənləşdirən əsas qüvvələrdir.. Ona görə də Asəf Əli Zərdarinin prezident seçilməsi Əfqanıstana qarşı bu ölkənin strateji siyasətini dəyişməyəcək.
Ekspertlərin fikrincə, Pakistan Taliban qiyamçılarının əsas sığınacaq yeri, bu ölkənin təhlükəsizlik strukturu isə Əfqanıstanda keçirilən terror aktlarının təşkilatçısıdır.
Pakistanın yeni prezidentinin mərhum yoldaşı Binəzir Bhutto "Talibanın anası" ləqəbi ilə tanınır. Mərhum Binəzir Bhutto vaxtilə Ərəbistan, ABŞ və İngiltərəninin köməyi ilə Taliban qiyamçılarını formalaşdırmışdı.
Zərdari iki gün öncə Pakistan parlamentinin nümayəndələri tərəfindən ölkənin prezidenti seçilib. Bir neçə gün sonra Zərdarinin andiçmə mərasimi keçiriləcək.
Əfqanıstan rəsmiləri ümid edirlər ki, Zərdari hər iki ölkənin təhlükəsizliyinin təmin edilməsi, eləcə də terrorizmlə mübarizə sahəsində yeni siyasət həyata keçirəcək.
"Əfqanıstan Pakistanın prezidenti seçilmiş Zərdaridən terrorizmlə mübarizə sahəsində və Əfqanıstana qarşı siyasətində heç bir dəyişiklik gözləmir", - Əfqanıstan Senatının Beynəlxalq Məsələlər üzrə Komissiyasının sədri Məhəmməd Elm İzədyar bazar ertəsi Trend -a bildirib.
"Pakistanda Xalq Partiyası hakimiyyəti ələ aldıqdan sonra Pakistan Əfqanıstanın daxili məsələlərinə müdaxilə edir və Taliban qiyamçılarını dəstəkləyirdi, yeni prezident də bunu təkrarlayacaq", - deyə İzədyar bildirib.
İzədyarın fikrincə, Pakistan hazırki şəraitdə müxtəlif daxili siyasi böhranlarla üz-üzədir. "Pakistanın daxili təhlükəsizliyi və Silahlı Qüvvələri hazırda Taliban qiyamçılarının bəzi radikal qrupları tərəfindən təhdid altındadır", - deyə İzədyar əlavə edib.
İzədyar Pakistanın daxili problemlərindən biri kimi ölkədə partiyalar arasında yaranmış siyasi ixtilafları qeyd edib. Ekspertlərin fikrincə, Pakistanda qarşıdurma yarandığı təqdirdə, Silahlı Qüvvələr və təhlükəsizlik strukturu ölkənin idarəsini ələ keçirəcək.
Əfqanıstan xalqı isə Pakistanın yeni hökumətindən bu ölkənin daxili məsələlərinə qarışmamağı və eləcə də Taliban qiyamçılarını dəstəkləməməyi, həmçinin terrorizmlə mübarizədə öz siyasətini dəyişməyi istəyir.
Müəlliflə əlaqə saxlamaq üçün elektron ünvan [email protected]