Azərbaycan, Bakı, 05 fevral / Trend , müxbir T.Cəfərov/
Bakıda səfərdə olan İran Parlamentinin səhiyyə komissiyasının üzvü Əbdülcabbar Kərəmi bildirib ki, BMT-nin İranı səhiyyə sahəsində dünyanın 93-cü ölkəsi kimi qələmə verməsi siyasi məqsəd güdür. Onun sözlərinı görə, İran səhiyyə sahəsində regionda ikinci, Asiyada isə beş ən yaxşı ölkə arasındadır və tibb, səhiyyə, dərman xidmətləri baxımından çox inkişaf etmiş ölkədir.
İranın səhiyyə naziri Mərziyə Vəhid Dəstgerdinin rəhbərliyi etdiyi nümayəndə heyətinin üzvü Kərəmi Trend bildirib ki, hazırda ölkənin müxtəlif idarələri, nazirlikləri və parlamentində 15 səhiyyə komissiyası var. "Parlamentin səhiyyə komissiyasının "dərman və səhiyyə" üzrə xüsusi ekspertlər qrupu var və ölkədə səhiyyə sahəsində tam əhatəli şəkildə fəaliyyət göstərir, Səhiyyə Nazirliyinə problemlər olduğu təqdirdə məruzə edir", - o deyib.
"Xüsusi planımız var və yaxın beş ildə səhiyyə sahəsində regionun liderinə çevrilmək üçün çalışacağıq", - Kərəmi deyib.
Kərəmi bildirib ki, ölkə əhalisinin, xüsusilə də azyaşlıların müxtəlif xəstəliklərə qarşı vaksinlə təmin olunması planı 100 faiz həyata keçirilib.
Kərəmi əlavə edib ki, ölkədə ağır və peşəkar cərrahiyyə əməliyyatları uğurla həyata keçirilir.
