Bakı. Trend:
Hakim Venesuela Vahid Sosialist Partiyasının (VVSP) konqresi və gənclər partiyası təşkilatı yekdilliklə hazırkı prezident Nikolas Maduronu prezident seçkilərində namizəd seçib.
Trend-in məlumatına görə, bu barədə "Venezolana de Televisión" telekanalı xəbər verib.
Məlumata əsasən, Venesuela prezidenti və VVSP sədri N.Maduronun namizədliyi ilkin partiya təşkilatlarının, icma şuralarının və ictimai təşkilatların əvvəlki iclaslarında 4 milyondan çox venesuelalı tərəfindən dəstəklənib.
N.Maduro üçüncü dəfə prezidentliyə namizədliyini irəli sürür. Venesuela Konstitusiyası respublika prezidentinin və digər seçkili vəzifələrin təkrar seçkilərinin sayını məhdudlaşdırmır. Prezident seçkiləri iyulun 28-də keçiriləcək.