Kazan. Trend:
Türkmənistan cari əsrdə bəşəriyyətin inkişafı üçün həlledici olacaq iqlim gündəminə diqqət yetirir.
Trend xəbər verir ki, bunu Türkmənistan prezidenti Sərdar Berdiməhəmmədov Kazanda keçirilən “XVI BRİCS” sammitinin "BRİCS plus" formatında ilk plenar iclasında çıxış edərkən bildirib.
"Türkmənistan iqlim gündəminə xüsusi diqqət yetirir, bu, cari əsrdə bəşəriyyətin inkişafını müəyyən edəcək. Biz iqlim problemlərinin qlobal təhlükəsizliyin ayrılmaz hissəsi kimi sistemli şəkildə nəzərdən keçirilməsinin tərəfdarıyıq və iqlim, ekoloji və texnogen fəlakətlərə nəzarət və reaksiya mexanizmlərinin yaradılmasını dəstəkləyirik", - dövlət başçısı bildirib.
Bundan əlavə, prezident Türkmənistan üçün Mərkəzi Asiyanın təbii ehtiyatlarının qorunmasının prioritet olduğunu vurğulayıb.
"Türkmənistan ekoloji əməkdaşlıq sahəsində Mərkəzi Asiyanın təbii ehtiyatlarının qorunmasına, Xəzər dənizinin dəniz mühitinin müdafiəsinə və bütün tərəfdaşların maraqlarına və beynəlxalq hüquq normalarına əsaslanan su ehtiyatlarının rasional istifadəsinə birinci dərəcəli əhəmiyyət verir", - o bildirib.
Qeyd edək ki, Tatarıstanın paytaxtında “XVI BRİCS” sammitinin plenar iclası keçirilir. Görüşdə MDB ölkələrinin liderləri, Asiya, Afrika, Yaxın Şərq və Latın Amerikası dövlətlərinin nümayəndə heyətləri, həmçinin bir sıra beynəlxalq təşkilatlarının rəhbərləri iştirak edirlər.