Azərbaycan, Bakı, 27 aprel /Trend, müxbir M.Əliyev/
Azərbaycanda Vətəndaş Cəmiyyətinə Yardım Assosiasiyasının (AVCİYA) ofisində şair Musa Yaqubun 75 illik yubileyi münasibətilə yeni çapdan çıxmış "Dövrün dəyirmanı" kitabının təqdimatı olub.
Trend-in məlumatına görə, kitabın çap olunmasına dəstək verən AVCİYA-nın prezidenti, Milli Məclisin deputatı Elxan Süleymanov təqdimat mərasimində bildirib ki, kitab gələcək nəsillərə mənəvi dəyərlərin aşılanması baxımından böyük əhəmiyyət kəsb edir.
"Şairi xalq yaşadır, ilhamlandırır. Azərbaycan gəncləri tez-tez Musa Yaqub yaradıcılığına müraciət etməli, onun əsərlərindən yararlanmalıdır", - o deyib.
Musa Yaqub təqdimatda bildirib ki, kitab şeirlər və poemalardan ibarətdir. "Dövrün dəyirmanı" məhəbbət və cəmiyyət haqqında yazılan və zəmanənin dəyişikliklərindən bəhs edən kitabdır", - şair deyib. Musa Yaqub hazırda mənəvi dəyərlərin bəzən ləğv olunduğunu və hər şeyin şou üstündə qurulduğundan danışıb.
Kitabda onun müxtəlif dövrlərdə yazdığı şeirlər və poemalar toplanıb.