Yeni nəticələr əlavə olunub (ilk xəbər saat 19:52-də yayılıb)
Azərbaycan, Bakı, 22 iyun /Trend/
Bakı-2015 Avropa Oyunları çərçivəsində boks yarışında Azərbaycanı kişilər arasında yüngülvari çəkidə (52 kq) təmsil edən Elvin Məmişzadə növbəti rinqinə çıxıb.
Trend-in məlumatına görə, 1/4 finalda bolqarıstanlı Daniel Asenovla qarşılaşan boksçumuz gərgin keçən döyüşdə qalib gəlib - 2:1.
Beləliklə, daha bir boksçumuz yarımfinala yüksəlməklə Avropa Oyunlarının ən azı bürünc medalını təmin edib.
X X X
Kişilər arasında yarım-ağır çəkidə (81 kq) mübarizə aparan Teymur Məmmədov 1/4 finalda niderlandlı Peter Mullenberqlə qarşılaşıb.
Boksçumuz layiqli qələbə qazanaraq adını yarımfinala yazdırıb - 3:0.
X X X
Bu gün rinqə sonuncu çıxan boksçumuz Azərbaycanı superağır çəki (+91 kq) dərəcəsində təmsil edən Məhəmmədrəsul Məcidov olub.
Təcrübəli təmsilçimiz 1/4 finalda türkiyəli boksçu Əli Demirezenlə qarşılaşıb.
Rəqibindən güclü olan M.Məcidov qələbə qazanmaqda çətinlik çəkməyib - 3:0.
Qeyd edək ki, bundan əvvəl digər idmançımız Tayfur Əliyev 1/4 finalda Danimarka idmançısı Frederik Yansenlə qüvvəsini sınayıb və 3:0 hesabı ilə qalib gələrək yarımfinal mərhələsinə çıxıb.