Azərbaycan, Bakı, 18 aprel /Trend/
Azərbaycanın ev sahibliyi etdiyi "Eurovision 2012" mahnı müsabiqəsinin "Bakı Kristal Zalı"nda məşqlərinə mayın 13-də start veriləcək.
Trend eurovision.az saytına istinadən xəbər verir ki, artıq Bakıdakı "Eurovision" şousunun məşqləri və təmsilçilərin mətbuat konfransları ilə bağlı müvafiq cədvəl hazırlanıb. Mayın 13-dən etibarən hər gün ənənəvi məşqlər keçiriləcək. İlk məşqdə Monteneqro, İslandiya, Yunanıstan, Latviya, Albaniya, Rumıniya, İsveçrə, Belçika və Finlandiya iştirak edəcək. Həmin tarixdən etibarən hər gün saat 11:00-dan 20:15-dək məşqlər keçiriləcək. Mayın 19-na kimi birinci və ikinci yarımfinal mərhələlərində çıxış edəcək ölkələr öz məşqlərini edəcəklər. Hər gün "Bakı Kristal Zalı" səhnəsində 9 təmsilçi məşqə çıxacaq.
Mayın 26-da keçiriləcək final mərhələsində birbaşa çıxış edən 6 ölkənin ilk məşqi isə mayın 19-da baş tutacaq. Azərbaycanın "Eurovision 2012" təmsilçisi Səbinə Babayeva həmin gün saat 17:00-da ilk məşqini edəcək. Təmsilçimizin ikinci məşqi mayın 20-də keçiriləcək.
Hər iki yarımfinal və final mərhələsinin əsas məşqləri şoudan bir gün əvvəl baş tutacaq.
Qeyd edək ki, 57-ci "Eurovision" mahnı müsabiqəsində 42 ölkə iştirak edir. Hər yarımfinalda 18 ölkə yarışacaq və iki yarımfinaldan ümumi olaraq 20 ölkə finala vəsiqə qazanacaq. Finalda isə birincilik uğrunda mübarizəyə 26 ölkə təmsilçisi qoşulacaq.