Azərbaycan, Bakı, 23 aprel /Trend, müxbir İlhamə İsabalayeva/
Azərbaycan Milli Elmlər Akademiyası Əlyazmalar İnstitutu daha bir Azərbaycan şairinin divanını əldə edib.
İnstitutdan Trend-ə verilən məlumata görə, Ağqoyunlular və Səfəvilər dövründə yaşamış (XV-XVI əsrdə) Azərbaycan şairi Əhməd Şövqi Təbrizinin lirik şeirləri toplusunun - divanının Ankara Milli Kitabxanasında saxlanan nüsxəsinin surəti tapılıb.
Təzkirələrdə verilən məlumata görə, Şövqi Təbrizi uzun ömür yaşayıb, Şah İsmayıl Xətainin oğlu Sam Mirzənin katibi - münşisi vəzifəsini icra edib, sonradan mühacirət edərək 1547-ci ildə Kabildə vəfat edib.
Şairin anadilli divanına onun qəzəl, qəsidə, mürəbbe, müxəmməs, tərkibənd, tərcibənd, mərsiyə, müstəzad, rübai, bayatı və gəraylılar daxildib.