Azərbaycan, Bakı, 16 oktyabr /Trend müxbir Elçin Mehdiyev/
Azərbaycanda noyabrın 1-də keçiriləcək parlament seçkilərini müşahidə etmək üçün Dairə Seçki Komissiyalarında (DSK) 37079, MSK-da isə 605 müşahidəçi qeydiyyatdan keçib. Trend-in məlumatına görə, bunu Mərkəzi Seçki Komissiyasının (MSK) sədri Məzahir Pənahov bu gün keçirilən iclasda deyib.
Onun sözlərinə görə, seçkiləri müşahidə etmək üçün 19 beynəlxalq qurumdan 222 müşahidəçi MSK-da qeydə alınıb.
İclasda həmçinin namizədliyin qeydə alınmasından imtina ilə bağlı Dairə Seçki Komissiyalarının qərarları ilə bağlı MSK-ya daxil olmuş bir neçə müraciətə baxılıb. Baxılan müraciətlərin 1-i üzrə DSK-nın qərarı ləğv edilərək müraciət təmin edilib.
Bundan əlavə, iclasda bəzi Dairə Seçki Komissiyalarının tərkibinə dəyişiklik edilib. Həmçinin, Ümid Partiyasının səlahiyyətli nümayəndələri qeydə alınıb.