...

Dələduzluqda təqsirləndirilən sabiq hakimin vəkili: 10 min dolları ödəyə bilərik

Gündəm Materials 6 Oktyabr 2021 12:27 (UTC +04:00)
Dələduzluqda təqsirləndirilən sabiq hakimin vəkili: 10 min dolları ödəyə bilərik

Trend-i buradan izləyin

Bakı. Samir Əli - Trend:

Bakı Ağır Cinayətlər Məhkəməsində sabiq hakim, dələduzluqda təqsirləndirilən Lətif Nəbiyevin cinayət işi üzrə məhkəmə iclası davam etdirilib.

Trend-in məlumatına görə, hakim İlham Mahmudovun sədrliyi ilə keçirilən prosesdə çıxış edən Lətif Nəbiyevin vəkili bildirib ki, müvəkkilinə qarşı irəli sürülən ittihamlar əsassızdır: "Bu iş dələduzluq yox, mülki məsələdir. Dəyən zərərlə bağlı isə sadəcə zərərçəkmiş kimi Rüstəm Abdullayevdən alınan sonuncu 10 min dolları qəbul edirik, bu məbləği isə müdafiə etdiyim şəxs razılaşma ilə ödəyə bilər".

Prosesdə Lətif Nəbiyevin digər vəkili isə müdafiə çıxışına hazır olmadığı üçün məhkəmədən vaxt istəyib.

Proses oktyabrın 12-də davam etdiriləcək.

Qeyd edək ki, uzun müddət Bakı Apellyasiya Məhkəməsinin və Suraxanı Rayon Məhkəməsinin hakimi olmuş Lətif Ədil oğlu Nəbiyev külli miqdarda dələduzluqda ittiham edilir.

İttihama görə, L.Nəbiyev zərərçəkmiş Azad İbrahimova 247 min 500 dollar Rüstəm Abdullayevə isə 59 min 700 dollar zərər vurub. O, R.Abdullayevdən pulu iş qurmaq adı ilə alıb. A.İbrahimovla qohum olan L.Nəbiyev həmin şəxsin pulunu Bakıda dəniz kənarında torpaq almaq məqsədi ilə alaraq dələduzluq edib.

Ona Cinayət Məcəlləsinin 178.3.2-ci (dələduzluq, külli miqdarda ziyan vurmaqda) maddəsi ilə ittiham verilib.

Xatırladaq ki, cinayət işi üzrə ibtidai istintaq başa çatdıqdan sonra baxılması üçün Gəncə Ağır Cinayətlər Məhkəməsinə göndərilsə də, məhkəmə aidiyyətlə bağlı məsələyə baxaraq işin Bakı Ağır Cinayətlər Məhkəməsinə göndərilməsi barədə qərar verib.

Məqalədə:
Xəbər lenti

Xəbər lenti