Azərbaycan, Şəki, 22 may / Trend , müxbir E.Quliyev/ 43 yaşlı Zaqatala sakini Qax rayonu ərazisində yerləşən meşədə özünü asıb. Zaqatala rayon Prokurorluğundan Trend -a bildirilib ki, Zaqatala rayonunun Suvagil kənd sakini, iki uşaq atası İskəndər Ömər oğlu Qurbanov Qax rayonu ərazisində, meşədə özünü ağacdan asaraq intihar edib. Məlumata görə, Qurbanov həmin meşədə nəzarətçi işləyirmiş və mərhum uzun illər əsəb xəstəliyindən əziyyət çəkib. Hadisə yerinə baxış keçirərək meyidi müayinə edən tibbi ekspertiza cəsədin üzərində heç bir zorakılıq əlamətləri aşkar etməyib. Faktla bağlı Qax rayon prokurorluğunda CM-nin özünü öldürmə həddinə çatdırma (125) maddəsi ilə cinayət işi başlanıb.
Zaqatala paytaxt Bakıdan 418 km şimal-qərbində yerləşir.
Azərbaycanda intiharların sayı barədə məlumat verilmir. Daxili İşlər Nazirliyi statistikanın prokurorluqda aparıldığını desə də, prokurorluq bu barədə məlumatların yayılmasını məqsədəuyğun saymır.
Ekspertlər bildirirlər ki, Azərbaycanda da intihar hadisələrinin sayı narahatlıq doğuracaq qədər ciddi xarakter alır. Bu narahatlıq özünü əsasən şimal və cənub regionlarında göstərir. Özünə qəsd edənlərin əksəriyyəti isə 18-25 yaş arasında olan gənclərdir.
Ədliyyə Nazirliyinin Məhkəmə Ekspertiza Mərkəzinin rəisi Fuad Cavadov bildirib ki, Azərbaycanda intiharların artmasına səbəb televiziyalarda, internetdə zorakılığı təbliğ edən filmlərin, kadrların açıq şəkildə nümayişidir.
Hər il dünyada 60 milyon insan intihara cəhd edir. İntihar edən şəxslərin 90%-i depressiya xəstəsidir. Depressiya xəstələrinin 15%-i intihara cəhd nəticəsində həyatlarını itirirlər. Depressiyada olan kişilərin intihar nəticəsində həyatını itirmə nisbəti qadınlara görə daha yüksəkdir.
Dünya Psixiatriya Assosiasiyasının konqresində 21-ci əsri "depressiya və intiharlar əsri" adlandırıblar. Ümumiyyətlə isə dünyada özünə qəsd hadisələrinin sayına görə postsovet ölkələri öndə gedir. Bu sırada birincilik Litvaya məxsusdur. Bu ölkədə intiharların sayı hər yüz min nəfərə - 42-dir. Onluğu isə müvafiq olaraq 36 nəfərlə Rusiya , 30 nəfərlə Qazaxıstan, 28 nəfərlə Macarıstan, 26 nəfərlə Latviya və Sloveniya , 25 nəfərlə Ukrayna, 24 nəfərlə Yaponiya və 21 nəfərlə Estoniya bölüşdürür.
Məqalə müəllifi ilə əlaqə ünvanı: [email protected]