RED. əlav.: sonuncu abzas əlavə olunub
Azərbaycan, Bakı, 12 mart / Trend , müxbir T. Hacıyev/
Bakının Binəqədi rayonunda Rəsuzadə qəsəbəsi, Əli-Məmməd küçəsi, 10/11 ünvanında yerləşən ikimərtəbəli yaşayış binası uçub. Bu barədə Trend -a cümə günü Binəqədi rayon Polis İdarəsindən məlumat verilib.
Hazırda Fövqəladə Hallar Nazirliyinin və rayon Polis İdarəsinin əməkdaşları hadisə yerindədir.
İlkin məlumatlara görə, insan tələfatı yoxdur.
"1946-cı ildə tikilmiş bu binada 11 ailə, cəmi 31 sakin yaşayıb. Sakinlərin hamısı evakuasiya olunub. Fövqəladə Hallar Nazirliyi binanın qəza vəziyyətində olması barədə sakinləri qabaqcadan xəbərdar etmişdi", - Trend -a hazırda hadisə yerində olan FHN əməkdaşı bildirib.
