Azərbaycan, Bakı, 29 oktyabr / Trend , muxbir K.Zərbalıyeva/
Beynəlxalq Qızıl Xaç Komitəsinin (BQXK) nümayəndələri erməni əsirliyində saxlanılan Azərbaycan Ordusunun əsgərləri ilə görüşüblər.
BQXK-nın Azərbaycan nümayəndəliyindən Trend -a verilən məlumata görə, təşkilatın nümayəndələri Rafiq Həsənov və Anar Hacıyevə baş çəkib, onlarla təkbətək söhbət aparıblar. BQXK-dən görüş barədə ətraflı məlumat verilməyib. Beynəlxalq təşkilatın nümayəndələri azərbaycanlı əsirlərin yazdıqları məktubları ailələrinə təqdim ediblər.
Rafiq Həsənovun atası Rəhman Həsənov Trend -a bildirib ki, oğlu ailəsinə göndərdiyi məktubunda salamat olduğunu yazıb. Əsirin ailəsi oktyabrın 23-də yazılan məktubu bu gün alıb.
Azərbaycan Müdafiə Nazirliyinin "N" saylı hərbi hissəsinin əsgəri, 20 yaşlı Rafiq Həsənov ötən il oktyabrın 8-də Qazax rayonu ərazisində qoşunların təmas xəttində Ermənistan hərbçiləri tərəfindən əsir götürülüb.
Goranboy Rayon Hərbi Komissarlığından hərbi xidmətə çağırılan 19 yaşlı Anar Hacıyev isə bu il mayın 10-da əsir götürülüb.
Məqalə müəllifi ilə əlaqə ünvanı: [email protected]