Azərbaycan, Bakı, 6 sentyabr /Trend, müxbir E.Tarıverdiyeva/
BMT-nin Azərbaycanın işğal olunmuş əraziləri barədə qəbul edəcəyi sənəd Ermənistanın Azərbaycan torpaqlarının işğalına diqqəti bir daha artıraraq Ermənistanın mövqeyini əhəmiyyətli dərəcədə zəiflədəcək. Ekspertlər belə hesab edir.
"Ermənistan BMT çərçivəsində bu məsələnin müzakirəsindən olduqca narahatdır. Onlar çox gözəl bilirlər ki, bu sənədin qəbul olunması işğalçı ölkənin mövqeyini daha da zəiflədəcək", - AŞ PA-nın vitse-prezidenti, Milli Məclisin beynəlxalq münasibətlər və parlamentlərarası əlaqələr komitəsinin sədri Səməd Seyidov Azərbaycanın hakim partiyasının rəsmi saytına verdiyi müsahibəsində deyib.
BMT Baş Assambleyası sentyabrın 7-də Cənubi Qafqaz üzrə bir sıra sənədlər, həmçinin "Azərbaycanın işğal olunmuş ərazilərində vəziyyət" haqqında qətnamə layihəsinin baxılacağı plenar iclas keçirəcək. Məlumatı BMT-in rəsmi saytı yayıb.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.
Ekspertlərin fikrincə, qətnamənin gələcək taleyindən asılı olmayaraq, BMT-də bu cür sənədin qəbul olunması faktının özü Ermənistanın vəziyyətini beynəlxalq siyasi arenada zəiflədəcək.
Seyidovun sözlərinə görə, bu sənəd vacibdir və əsas məsələ odur ki, dünya ictimaiyyəti bu məlumatlardan sonra işğal faktına münasibətini bildirməlidir. Nüfuzlu beynəlxalq təşkilatlarda bu məsələnin müzakirə olunması və bu müzakirələr əsasında hər hansı sənədin qəbul olunması Dağlıq Qarabağ probleminin nizamlanması üzrə göstərilən səylər üçün əhəmiyyətlidir", - Seyidov deyib.
Azərbaycan parlamentinin birinci vitse-spikeri Ziyafət Əsgərovun fikrincə, Azərbaycanın işğal olunmuş ərazilərində vəziyyəti əks etdirən BMT qətnaməsinin qəbulu Ermənistanı çətin vəziyyətə salacaq.
"Əminəm ki, Azərbaycanın haqq işi yenə qalib gələcək. Daha doğrusu, Azərbaycan ən azı BMT-nin növbəti dəstəyini qazanacaq. Bu, Ermənistanı öz hərəkətləri ilə bağlı ciddi düşünməyə vadar edəcək", - Əsgərov Trend-ə bildirib.
Qətnamənin qəbulunu Yerevan üçün diplomatik məğlubiyyət hesab edən erməni deputatlar da bu fikirdədir.
"İrs" müxalifət partiyasının parlament fraksiyasının katibi Larisa Alaverdiyan bəyan edib ki, qəbul ediləcəyi halda, qətnamənin hüquqi nəticələri olmayacaq, "lakin siyasi mənada bu sənəd erməni tərəfinin mövqelərinə mənfi təsir göstərəcək". Məlumatı "Mediamaks" agentliyi yayıb. O, Ermənistan hakimiyyətini mümkün təhlükənin neytrallaşdırılması üçün adekvat tədbirlər görməyə və "dəqiq və savadlı hazırlanmış qətnamə layihəsi"ni cavabsız qoymamağa çağırıb.
Ermənistan Demokratik Partiyasının (EDP) lideri Aram Sarkisyanın sözlərinə görə, Ermənistan beynəlxalq strukturlarda Azərbaycana münasibətdə düzgün olmayan diplomatiya aparır.
Alman politoloq Aleksandr Rarın sözlərinə görə, BMT Təhlükəsizlik Şurasının Azərbaycanın işğal olunmuş ərazilərinə dair qətnaməsi qəbul olunarsa belə, bu məsələ ilə bağlı BMT-nin bundan əvvəlki qətnamələri kimi yerinə yetirilməyəcək. Lakin onun fikrincə, sənəd gələcək danışıqlar üçün əhəmiyyətli olacaq.
"Hər halda bu qətnamə qəbul ediləcək, lakin tarix üçün, bir-birinə güzəştə getməyin lazım olduğunu göstərmək üçün qəbul olunacaq, - Berlindən AFR-in Xarici Siyasət Şurasının "Rusiya-Avrasiya" Mərkəzinin direktoru, Trend-in Ekspert Şurasının üzvü Rar telefonla bildirib. - Lakin hesab edirəm ki, buna da əməl olunmayacaq, çünki mən hazırkı vəziyyətdə heç bir kəskin dəyişiklik görmürəm".
Onun fikrincə, Azərbaycan tərəfindən başqa, indi heç kim Dağlıq Qarabağ münaqişəsinin həll olunmasını istəmir.
"Bu, Dağlıq Qarabağ məsələsi ətrafında nə üçün heç nəyin baş vermədiyini izah edir", - Rar bildirib.
Materialın hazırlanmasında M.Əliyev, V.Javoronkova iştirak ediblər.
