Azərbaycan, Bakı, 15 dekabr /Trend, müxbir M.Əliyev/
ATƏT-in qiymətləndirmə missiyasının Azərbaycanın işğal olunmuş ərazilərində vəziyyət barədə hesabatı geniş və faktlara əsaslanan olmalıdır. Bu barədə çərşənbə günü jurnalistlərə Azərbaycan Milli Məclisinin vitse-spikeri Bahar Muradova deyib.
"Qiymətləndirmə missiyası son dəfə belə hesabatı beş il bundan əvvəl təqdim edib, lakin keçən müddət ərzində işğal olunmuş ərazilərdə erməni vəhşilərinin əməlləri nəticəsində Azərbaycanın tarixi-mədəni abidələri daha çox dağıdılıb. Buna görə hesabat daha geniş olmalı və bu faktları tam əks etdirməlidir", - Muradova qeyd edib.
Vitse-spiker Azərbaycanın işğal olunmuş ərazilərindəki vəziyyəti real əks etdirəcək hesabatın obyektiv olacağına ümid etdiyini bildirib.
"Bu sənəd münaqişənin həlli zamanı mətnində göstərilən faktlara istinad etmək üçün əhəmiyyət kəsb edir", - o, qeyd edib.
ATƏT-in qiymətləndirmə missiyası oktyabrın 4-dən 14-dək Azərbaycanın işğal olunmuş ərazilərində olub. ATƏT-in Minsk qrupunun həmsədrlərini BMT-nin Qaçqınlar üzrə Ali Komissarlığının nümayəndələri müşayiət ediblər.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır.
1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır. BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.