Azərbaycan, Bakı, 2 fevral /Trend, müxbir S.Ağayeva/
ATƏT-in Parlament Assambleyasının qış sessiyası zamanı Cənubi Qafqazda münaqişələr üzrə ATƏT PA-nın xüsusi nümayəndəsi təyin oluna bilər. Bu barədə çərşənbə günü Trend-ə diplomatik mənbələrdən məlumat verilib.
"Fevralın 24-25-də Vyanada keçiriləcək ATƏT PA-nın qış sessiyası zamanı Dağlıq Qarabağ və Gürcüstan münaqişələri üzrə qurumun xüsusi nümayəndəsi təyin oluna bilər", - çərşənbə günü Trend-ə diplomatik mənbələrdən məlumat verilib.
ATƏT-in Dağlıq Qarabağ və Gürcüstan üzrə sabiq xüsusi nümayəndəsi Qoran Lenmarker ötən ilin noyabrında həmin vəzifədən azad edilib. Lenmarker 2010-cu ilin sentyabrında İsveçdə keçirilən parlament seçkilərində məğlub olduğuna görə, ATƏT PA-nın deputatı deyil.
ATƏT PA-nın prezidenti istənilən zaman öz xüsusi nümayəndəsini təyin etmək səlahiyyətinə malikdir. Lakin mövcud vəzifəyə namizədlik hələ elan olunmayıb.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.