Azərbaycan, Bakı, 2 aprel /Trend, müxbir M.Əliyev/
BMT-nin Azərbaycandakı rezident-əlaqələndiricisi Fikrət Akçura dünya ictimaiyyətini BMT-nin Dağlıq Qarabağ münaqişəsinin nizamlanması üzrə qəbul etdiyi, hələ də yerinə yetirilməmiş qalan dörd qətnamənin həyata keçirilməsi üzrə səyləri aktivləşdirməyə çağırıb.
"Biz anlayırıq ki, BMT-nin qəbul etdiyi bəzi qərarlar həyata keçirilməmiş qalıb. Bir milyondan artıq qaçqın və məcburi köçkün 20 ildir ki, öz evlərindən uzaqda yaşayırlar və bu, həll tələb edir", - Trend-in məlumatına görə, şənbə günü Akçura jurnalistlərə bildirib.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.