Azərbaycan, Bakı, 15 dekabr /Trend/
"ABŞ və Rusiya arasında qlobal çağırışlara hərtərəfli cavabların inkişafında effektiv əməkdaşlıq var." Trend-in məlumatına görə, bunu ABŞ Dövlət katibinin köməkçisi Filip Qordon Senatın ABŞ-Rusiya münasibətləri ilə bağlı dinləməsində deyib.
"ATƏT-in Minsk qrupunun həmsədrləri olaraq ABŞ və Rusiya Fransa ilə birlikdə Dağlıq Qarabağ münaqişəsinin həllinin sülh yolu ilə tapılması üçün sıx əməkdaşlıq edirlər", - Qordon bildirib.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.