Azərbaycan, Bakı, 21 yanvar / Trend , müxbir S.İlhamqızı/ Müxalifətçi Vətəndaş Həmrəyliyi Partiyasının sədri, millət vəkili Sabir Rüstəmxanlı hesab edir ki, builki prezident seçkisində müxalifət düşərgəsindən çoxlu sayda namizədlərin olması iqtidarın şansını artırır.
"Mənim fikrimcə, bu seçkidə ən şanslı namizəd indiki prezident İlham Əliyevdir" - deyə Rüstəmxanlı bazar ertəsi Trend ə açıqlamasında bildirib.
Bu ilin oktyabrında Azərbaycanda növbəti prezident seçkisi keçiriləcək. Müxalifət düşərgəsindən VHP, Müsavat, Ümid, Böyük Quruluş partiyaları prezident seçkisində öz namizədi ilə iştirak etməyə qərar verib. Hakim Yeni Azərbaycan Partiyası da indiki prezident İlham Əliyevin seçkidə iqtidarın namizədi olacağını bəyan edib.
Rüstəmxanlı bildirib ki, müxalifətin seçkidə vahid namizədlə iştirak etməməsi, bu düşərgənin dağınıq vəziyyətdə olması, iqtidarın və xarici qüvvələrin müxalifəti parçalamaq cəhdləri - hamısı müxalifətin seçkidə şansını azaldan səbəblərdir: "Həm də indiki seçki sistemi yalnız iqtidarın xeyrinə işləyir. Bu sistemlə iqtidarda kim olsa, o da qalib gələcək"-deyə Rüstəmxanlı bildirib.
VHP sədri əlavə edib ki, müxalifət namizədlərinin ayrı-ayrılıqda hər birinin şansının çox az olduğunu düşünür, lakin baxmayaraq, partiyası bu mübarizədə iştirak etməyə qərar verib : "Siyasi proseslərdə perspektivi görməsən, mübarizəyə qoşulmasan, onda gərək siyasətlə məşğul olmayasan"-deyə VHP sədri bildirib.
VHP Milli Azadlıq Hərəkatının liderlərindən olan Sabir Rüstəmxanlının rəhbərliyi altında 1992-ci il sentyabrın 26 -da bir qrup ziyalı tərəfindən yaradılıb. VHP 1995, 2000, 2005-ci illərin parlament, 2003-cü ilin prezident, 1999, 2004-cü illərin bələdiyyə seçkilərində iştirak edib. Partiyanın sədri millət vəkili, xalq şairi Sabir Rüstəmxanlı 1991-95-ci illərdə mətbuat və informasiya naziri, 2003-cü il prezident seçkisində prezidentliyə namizəd olub. O, səkkiz namizəd arasında beşinci yerdə olub.
