Azərbaycan, Bakı, 05 fevral / Trend , müxbir S.İlhamqızı/Beş müxalifət partiyasının yaxın 5 il ərzində birgə əməkdaşlığına dair layihə hazırlanıb. Bu barədə çərşənbə axşamı Trend ə Tərəqqi Partiyasının sədri Çingiz Dəmiroğlu məlumat verib.
Azərbaycan Naminə İctimai Forum, Azərbaycan Milli İstiqlal, Azərbaycan Demokrat, Müsavat, Tərəqqi partiyaları ötən ilin yayından məşvərət aparmaq məqsədilə toplanırlar.
Məşvərət qurumunun koordinatoru Dəmiroğlu bildirib ki, əməkdaşlığın gələcək perspektivini müəyyənləşdirmək üçün təkliflər layihəsi hazırlanıb. Bu layihə beş müxalifət təşkilatının qarşıdakı 5-6 il ərzində əməkdaşlığını nəzərdə tutur.
Tərəqqi Partiyası sədrinin sözlərinə görə, "beşlər" əvvəlcə bu ilin oktyabrında keçiriləcək prezident seçkisi ilə bağlı əməkdaşlıq edəcəklər: "Seçkinin nəticələrinin saxtalaşdırılmaması, qazanılan səslərin sayılması üçün səylərimizi birləşdirəcəyik"-deyə partiya sədri bildirib.
Onun sözlərinə görə, məşvərət qurumunun bu həftə toplantısı keçiriləcək və layihə barədə müzakirələr aparılacaq. Görüşdə təkliflərə dair razılışma əldə olunması gözlənilir.
