Fransa, Strasburq, 18 fevral/ " müxbir A.Məhərrəmli/ Avropa Şurasının Nazirlər Komitəsi fevralın 20-də Kosovonun müstəqilliyinin elan edilməsi məsələsini müzakirə edəcək. Bu barədə Trend -ə bazar ertəsi, təşkilatın Baş katibinin mətbuat katibi Matias Qruden məlumat verib.
Kosovo parlamenti fevralın 17-də yekdilliklə diyarın müstəqilliyi haqqında Bəyannaməni təsdiq edib. Belqrad diyarın müstəqilliyinin elan edilməsi haqqında aktı etibarsız adlandırıb və dünya ictimaiyyətini "onu beynəlxalq hüquqa zidd olduğu üçün ləğv etməyə" çağırıb. Rusiya Kosovonun özbaşına müstəqilliyi statusunun ləğv edilməsi, həmçinin, müstəqilliyin əleyhinə olan əhalinin təhlükəsizliyinin təmin edilməsini təkid edəcəyini bildirib.
Bazar ertəsi Kosovo məsələsi BMT-nin iclasında müzakirə ediləcək. Artıq bir neçə ölkə, o cümlədən ABŞ və Almaniya Kosovonun müstəqilliyini dəstəkləyiblər.
Kosovoda təqribən 2 mln. əhali yaşayır, bunun 90 faizi diyarın müstəqilliyi uğrunda çıxış edən etnik albanlardır. Kosovonun formal olaraq Serbiyanın tərkibinə daxil olmasına baxmayaraq, diyar 1999-cu ildən faktiki olaraq BMT-nin inzibati qüvvələri tərəfindən idarə olunur. 2008-ci il fevralın 4 -də Avropa İttifaqı Kosovoya bu regiondakı mavi dəbilqəliləri əvəz edəcək 1,8 min inzibati-polis missiyasının göndərilməsinə razılıq verib.
