Azərbaycan, Bakı, 21 fevral / Trend , müxbir S.İlhamqızı/ Müxalifətçi Fəzilət Partiyası Azərbaycanın Ədliyyə Nazirliyi qarşısında etiraz aksiyalarına başlayacaq. Bu barədə Trend ə partiyanın sədri Gündüz Hacıyev məlumat verib.
Partiya 2005-ci ildə təsis olunub, həmin il iyunun 30-da sənədləri Ədliyyə Nazirliyinə təqdim olunub.
Hacıyevin sözlərinə görə, 3 il keçməsinə baxmayaraq, indiyədək də partiyanın qeydiyyata alınıb-alınmaması ilə bağlı cavab verilməyib.
"Biz dəfələrlə nazirliklə əlaqə saxlamışıq, amma partiyanın nə üçün dövlət qeydiyyatına alınmaması barədə heç bir səbəb göstərmirlər. Yalnız deyirlər ki, sənədlərimizin qanunauyğunluğu yoxlanılır"-deyə Hacıyev bildirib.
Onun sözlərinə görə, dövlət qeydiyyatının olmaması partiyanın aktif fəaliyyətinə, hətta qərargahla təmin olunmasına əngəl törədir. Partiya sədrinin dediyinə görə, icarədarlar partiyanın dövlət qeydiyyatının olub-olmaması ilə maraqlanırlar, qeydiyyatın olmamasına görə, öz obyektlərini onlara qərargah üçün icarəyə verməkdən imtina edirlər. Ona görə də hazırda partiyanın qərargahı belə yoxdur.
"Biz bir daha Ədliyyə Nazirliyi ilə əlaqə saxlayıb qeydiyyat probleminin nə vaxt həll olunacağı ilə maraqlanacağıq. Əgər bizə müsbət cavab verilməsə, mart ayından nazirliyin binası qarşısında etiraz aksiyalarına başlayacağıq"-deyə partiya sədri bildirib.