Azərbaycan, Bakı, 04 mart / Trend , müxbir S.İlhamqızı/ Güney azərbaycanlıların hüquqlarının pozulmasına etiraz əlaməti olaraq İran İslam Republikasının Türkiyədəki səfirliyinin qarşısında piket keçirilib. Bu barədə Trend ə Türk Millətçi Partiyasından məlumat verilib.
Aksiyada Türk Dünyası İnsan Haqları Dərnəyi, Türkiyədə Təhsil alan Güney Azərbaycanlı Tələbələr Birliyi və Türk Millətçi Partiyası Türkiyə Təmsilçiliyinin fəalları iştirak ediblər.
Piketdə İran hakimiyyəti tərəfindən Güney Azərbaycan türklərinin hüquqlarının tapdalanması, son dövrlər İran rejiminin kütləvi həbslərə başlaması, Güney Azərbaycanda keçirilən mitinqlərin dağıdılması, bir çox tanınmış hərəkatçıların həbs edilərək işgəncələrə məruz qoyulması faktlarına etiraz bildirilib.
Aksiyaçılar İran rejimini beynəlxalq konvensiyalara, İnsan haqları barədə razılaşmalara əməl etməməkdə günahlandırıblar, İranda yaşayan çoxmilyonlu azərbaycanlılara qarşı təqib və təzyiqlərə son qoyulmasını tələb ediblər. Türkiyə ictimaiyyətini, mətbuatını Güney Azərbaycanda baş verən hadisələrə daha diqqətlə və həssaslıqla yanaşmağa çağırıblar.
Təşkilatçılar Güney Azərbaycan türklərinin hüquqlarının müdafiəsi ilə bağlı kütləvi tədbirləri davam etdirməyə qərar veriblər.
Qeyri-rəsmi məlumatlara görə, İranda 35 milyona yaxın yerli azərbaycanlı yaşayır.