Azərbaycan, Bakı, 06 mart / Trend , müxbir S.Babayeva/ Rabitə və İnformasiya Texnologiyaları Nazirliyinin "Azerpocht" Dövlət Müəssisəsi 2004-2008-ci illər üçün Azərbaycan regionlarının sosial-iqtisadi inkişafı üzrə Dövlət proqramı çərçivəsində 3 mln. manat vəsait alıb,- cümə axşamı DM-dən bildiriblər.
"Bu vəsaitlər poçt xidmətlərinin yaxşılaşdırılmasına yönəldilib və regionlarda yeni poçt şöbələrinin tikintisinə sərf ediləcək" - müəssisədən bildiriblər.
Təşkilatdan qeyd ediblər ki, ayrılmış vəsait hesabına tikintisi və bərpası planlaşdırılan obyektlərin siyahısı hələ təsdiq olunmayıb. Bir şöbənin tikintisi, orta hesabla, 28 min manata başa gəlir.
Keçən il Dövlət Proqramı çərçivəsində "Azerpocht" DM-yə 1,5 mln. manat vəsait ayrılmışdı ki, bu vəsait hesabına tikilməli olan 53 obyektdən 36-sı tikilib təhvil verilib. Digər şöbələrin tikintisi üzrə işlər isə Rabitə Nazirliyinin şəxsi vəsaiti hesabına həyata keçirilib.
"Azerpocht" 2007-ci ildə 250 yeni iş yeri və 97 yeni poçt şöbəsi açıb. Təşkilat Ümumdünya Poçt İttifaqının tövsiyəsi ilə 1997-ci ildə yaradılıb. DM-nin tərkibinə 59 poçtampt, 2 poçt müəssisəsi, 2 törəmə müəssisə və 8 rabitə qovşağı daxildir. DM ölkənin bütün yaşayış məntəqələrini əhatə edir, 1,3 min poçt şöbəsi var.