Azərbaycan, Bakı, 29 mart / Trend , müxbir C.Babayeva/ Azərbaycanın Müasir Müsavat Partiyası gələn həftə ATƏT-in Minsk qrupu üzrə həmsədr ölkələrin səfirlikləri qarşısında etiraz aksiyası keçirəcək. Bu barədə şənbə günü Trend a partiya sədri Hafiz Hacıyev məlumat verib.
Hacıyevin sözlərinə görə, aksiya Rusiya, Fransa və ABŞ-ın simasında ATƏT-in həmsədr ölkələrinin martın 14-də BMT Baş Assambleyasının sessiyasında qəbul edilən "Azərbaycanın işğal olunmuş ərazilərində vəziyyət haqqında" Qətnaməni qəbul etməmələri ilə əlaqədar olaraq ATƏT-in Minsk qrupunun fəaliyyətindən imtina edilməsi tələbi ilə keçiriləcək.
"Aksiya hətta Bakı Şəhər İcra Hakimiyyəti tərəfindən icazə verilməyəcəyi təqdirdə belə keçiriləcək" - deyə Hacıyev bildirib.
Müasir Müsavat Partiyası 2000-ci ildə təsis edilib, 2002-ci ildə dövlət qeydiyyatından keçib. Partiya özünü konstruktiv müxalifət hesab edir.