...

Beyrutun Dəməşq sammitini boykot etməsi Suriya-Livan münasibətlərini dəyişdirməyəcək - ekspertlər

Siyasət Materials 29 Mart 2008 15:01 (UTC +04:00)

Azərbaycan, Bakı,29 mart / Trend , müxbir R.Hafizoğlu/ Livan hökumətinin Dəməşqdə keçirilən Ərəb Ölkələri Liqası sammitini boykot etməsi Suriya ilə onsuz da gərgin olan münasibətlərə dəyişiklik qətirməyəcək. "Dəməşqdə keçirilən Ərəb Ölkələri Liqası sammitinin boykot edilməsi Livan hökumətinin Suriyaya qarşı sərt siyasətində israrlı olduğunu gösrərir" - deyə Livanlı politoloq Rəhim Bayram Trend a bildirib.

Əl-Cəzirə telekanalının martın 27-də verdiyi məlumata görə, Livan hökuməti Suriyanın paytaxtı Dəməşqdə martın 27-29 keçiriləcək Ərəb Ölkələri Liqası sammitini boykot edib. Livanın baş naziri

Fuad Senyora Suriyanın və onun dəstəklədiyi "Hizbullah" təşkilatını ölkə maraqlarına zidd siyasət və siyasi böhranda ittiham edib.

"Livan maraqlarına zidd siyasət aparan bir ölkədə keçirilən toplantıya qatılmağın heç bir faydası yoxdur"-deyə livanlı müstəqil politoloq Bayram şənbə günü Beyrutdan elektron poçtla bildirib. Politoloqun fikrincə, Livan hökuməti bundan sonra da ölkə maraqlarına zidd siyasət aparan dövlət və qurumlara qarşı sərt mövqe nümayiş etdirəcək. "Suriya Livan hökumətinin maraqlarına zidd siyasət aparan "Hizbullah" və "Əməl" təşkilatlarına maliyyə dəstəyini kəsməlidir" - deyə politoloq bildirib.

Digər livanlı politoloq Salim əl-Züheyri də hesab edir ki, Livan hökuməti Dəməşq sammitini boykot etməklə Suriyaya narazılıq mesajı verib. "Ərəb Ölkələri Liqası sammitinin Livan üçün heç bir siyasi əhəmiyyəti yoxdur" - deyə Böyuk Britaniyada fəaliyyət göstərən "Asharqalarabi" agentliyinin direktoru Züheyri şənbə günü Londondan Trend a telefonla bildirib. "Sammitin boykot edilməsi Suriya-Livan münasibətlərinə əsla təsir etməyəcək" - deyə o əlavə edib.

Politoloq hesab edir ki, Livan hökuməti yaxın gələcəkdə ölkə maraqlarına zidd siyasət aparan Suriya ilə bütün dirlomatik əlaqələri də dondura bilər.

Suriya Siyasi Araşdırmalar Mərkəzinin adının açıqlanmasını istəməyən eksperti isə hesab edir ki, Livan hökuməti sammiti boykot etməklə ölkədəki siyasi böhranı həll etmək fürsətini itirib. "Livanın Suriyanı ölkədəki siyasi böhranda ittiham etməsi əsassızdır. Suriyanın Livanda heç bir siyasi maraqları yoxdur "-deyə o, şənbə günü Dəməşqdən Trend a telefonla bildirib. Politoloq hesab edir ki, sammitin boykot edilməsi Suriya-Livan münasibətlərinə müsbət və ya mənfi təsir edə bilməz.

Əl-Cəzirə telekanalının bu gün verdiyi məlumata əsasən, Suriya xarici işlər naziri Vəlid əl-Müəllim Livan hökumətini Ərəb Ölkələri Liqasının sammitini boykot etməkdə təqsirləndirərək, bildirib ki, Fuad Sinyora sammiti boykot etməklə siyasi səhv buraxıb. "Reuters" agentliyinin verdiyi məlumata görə, Səudiyyə Ərəbistanı da Dəməşqdəki sammiti boykot edib.

Xəbər lenti

Xəbər lenti